Yakumanta pachamamaq unquyninmanta

LETRA

Yakumanta pachamamaq unquyninmanta

YAKUMANTA PACHAMAMAQ UNQUYNINMANTA

Juk kuti jatun tatayta tapurqani. Tata tata wawa kawsayniykimanta imatataq niwankiman.
Jatun Tatayqa llakiy uya qhawawaspa umanta ikhaykachaspa jinata kutichiwarqa.
Ñawpa kawsayqa sumaq kaway karqa llimphu wayrayuq ch’uwa yakuyuq mana q’usñiyuq
Janaqpachapi inti tatayuq kay jallp’apitaq pachamamayuq.

Muyuq wayrampis muyuririspa phuyukunata turiariq karqa illapawantaq wach’irichispa yana phuyuta waqachiq karqa.
Chay waqaywantaq jallp’a junt’ata chhillchirichispa qarpariq karqa.
Tata k’uychitaq q’ala kusisqa janaqpachapi wiphalitanta warkhurikuspa jaqay chhillchi paritapi juk wayñituta tusukuq karqa, P’isqukunataq misk’i khuyuypi paykuna pura atipakuspa Sapa paqarin tukuy puñuqta rich’achiq kanku.

Ñawpa kawsayqa sumaq kawsay karqa. ch’uwa yaku paramuspa ma ni imawan ch’alikuspa mallkikunata p’uturichirqa. Chhulla yakupis larq’a pampapi q’achuq laqhinpi
thapachakuspa sapa paqarin tukuy puriqta juq’uchaq karqa.

Ñawpa kawsayqa sumaq kawsay karqa, kunan kama tapukuni
Imaqtinchus inti tata kay kawsayta qhichuwanchiq
mamaqhuchata wanp’uspa tukuy q’inquta purispa
karu runa chayanuspa waq kawsayta apamunku.
Chayman pacha ñawpa kawsay wañurispa
waq kawsayta kicharparin musuq kawasay sutiyuqta.

Karuruna chayamuspa wiñanata jatunyayta apamunku.
Ruwachawan allwiyawan tukuy ima llamk’anawan wayrachata ch’ichichanku.
Parapis millay q’usñiwan chaqrukuspa qarpay yakuta q’arkuyachin.
Pampapis q’ara pampalla manapuni t’ikarinchu, ch’akiymanta laqrakuspa ma yurata p’utuchinchu.
Mayukunata ch’ichichanku.

Mamaquchapi q’ikyawiq sut’uyninwan challwakunata wañuchinku, Chay ruwacha q’usñiwantaj janaqpacha anqasmanta yanayapun. Chay q’usñipi intiq wach’in qhillayaspa ma utqhayta kutirinchu.
Chay raykutaq jallp’a junt’a q’uñiripun. Kay kawsayqa manaña ñawpajinachu.
ma parananpi paran, upyana yaku tukukapun , sumaq kawsaypis ujinayan
tarpuy jallp’ataq ch’akipun.

Jatunyaywan ruwachawan allwiyawan pacha muyu unqurparin, Kay unquyqa musuq unquy
Calentamiento global sutinku, Ama pacha wañunanpaq jallp’a junt’ata khuyana.
Sach’ararata k’utunamanta inkhanamanta pakana.
Mayu yakuta larq’a yakuta millay q’upa jich’anamanta jark’ana, Mayukunata pichaspa yakunta ch’uwayachina. Nilonmanta plastikunanta jallp’anchiqta jark’arina

Imata apanapaqpis ch’uspata wayaqata kutamata raphimanta k’uyumanta ruwakuna
Chay raphiqa chay k’uyuqa jallp’aq masin mana payta unquchinchu
Runakuna jallp’anchiqta wañunamanta jarq’arina, Wawakunapaq qhipa runa kawsaqkunapaq
Puquq jallp’ata suyarichina, Ñuqamchik jina llimphu wayrata ch’uwa yakuta riqsinankupaq.
Tata k’uychiwantaq janaqpachapi wiphalitanta warkhurikuspa Jaqay chhillchi paritapi juk wayñituta tusunankupaq.
Jatun tatayta uyarispa yakumanta pachamamaq unquyninmanta sumaqtapuni umachakuni
Puñuspapis tataypata k’amiyninta yuyarispa yakuwan musqurikuni